कविता: “रीता गौं” – कवि पीताम्बर शर्मा

बल सुण रै दीदा तेरा सौं,
अब नि रान्दू मीं अपड़ा गौं।

मेरा गौं मां मनिखि नि रयां,
कु पूछलु कि कै मौ का छैयां।
न छुईं न बात न बौणं न घर,
अपड़ी गाणी ख़ुद आफूमा लगयां।।

न घिंडूंडी की फुर न घुघुती की घुर,
न गोर बाखर तैं अब बाघै कि डर।
गूणी बाँदुरु को राज भैर, अर,
छिपड़ा मकड़ों को राज भीतर।।

मेरा गौं मां तुम शौक से जयां,
इखुली पकयां अर इखुली खय्यां ।
बांजा पुड़ीन्न खेती पाती,
राशन पाणी अफु सणी ल्हिजयां।।

न ब्यौ बरात, न बाजों कु साज,
न ख़ुद भटुली, न पैतुलि पराज।
न चुल्ला की रोटी, न लड़बड़ी दाल
हरचिनी पतला, पंगत कू रिवाज।।

अकलाकंठ मां रै ग्यों दीदा,
कैमां बच्याण, कैका धोरा जों।
बल सुण रै दीदा तेरा सों,
अब नि रान्दू मै अपड़ा गों।।